طريقة رائعة للحصول على مسمن مفشفش و مورق اروع ما يكون

من طرف samar 2011-08-10, 08:01

السلام عليكم
اليوم عندي لكم طريقة للحصول على مسمن مورق كيجى ناشف من زيت و محلول صراحة لداقو عندي كيحماق عليه.علماتو لية حماتى كنشكرها عليه بزاف
بلا منطول عليكم خدو الطريقة و تبعوها بالترتيب و ان شاء الله غادي يعجبكم
خودي قصرية ديري فيها 1 كيلو فورص+ نصف كيلو قمح ممتاز
شوية الملح+شوية خميرة الدار قياس حمصة (يعني فاش تكوريها بين صبعانك تولي قد الحمصة
وكديري ملعقة صغيرة سكر سنيدة كتجمعيها بالماء عادي وكدلكيها مزيان غطيها ببلاستيكا خليها ترتاح بينما دوبتي شوية الزبدة هاديك ديال لعبار الصفرة. وتزيدي الزيت تخلطيهم و تبداي تكوري لعجينة حتى تكمليها و تخليها ترتاح بينما غسلتي لقصرية و رجعتيها لبلاصتها و غسلتى بوتاجي فين غادا تكرسي لمسمن و تنشفيه مزيان من بعد كتاخدي كورة العجين كتكرسيها مزيان حتى تولي شفافة و رقيقة كدهنيها بشوية الزيت و الزبدة و كترشى فوقهم شوية الفورص مخلط مع خمارة الحلوة و كتبداي تطوي و تدهني بالزيت و الزبدة و ترشي بالفورص مع كل طية بحال لمسمن العادي و تحطيها و تاخدي وحدة اخرا تكرسيها بنفس الطريقة و تدهنيها و ترشيها بالفورص و تاخدي لمسمنة الاولى و تبسطيها شوية بيدك و تحطيها وسط لمسمنة التانية لي كرستى و ترشي فوقها وتطوي لمسمنة التانية و هي وسط منها لمسمنة الاولى طبعا مع كل طية كدهني و ترشى. و تحطيها ترتاح و تبداي في المسمنة الاخرى بحال الاول يعني دائما كتجى مسمنة وسط مسمنة و ملي تطوي على الاقل 4 المسمنات وحدة في وحدة تسخني المقلة وتبسطي لمسمنة و تخبزيها بلا ما ترشي لمقلة بالزيت و دائما فاش تحطي لمسمنة في المقلة غير تبدا تشد فى راسها قلبيها ما تخلهاش حتى تطيب عاد تقلبيها .وملي تحمر حايديها. و هكدا غادى تحصلي على مسمن ما تشبعيش منه
نتمنى نكون وصلت ليكم الطريقة و تكون مفهومة و نتمنى نكون فدتكم. لي جرباتو ترد علية لخبار و لي عندها شي طريقة اخرى تفيدنا بيها و الله يخلينا ديما كريمات مع بعضنا و لي كتعرف تعلم لي مكتعرفش و لي ما كتعرفش تسول ولي سولت تلقى لي يجوبها و السلام و عليكم